جینے کی اک امنگ میر ے پاس تو رہی

کچھ دیر کو سہی یہ خوشی راس تو رہی

یا دوں کے اثا ثے ہیں میر ے پاس بہت سے

کچھ وقت گذاری کی مجھے آس تو ر ہی

یہ کیسا جام تھا جسے پینے کے بعد بھی

سانسیں ہو ئیں بحال مگر پیا س تو رہی

جس کی مجھے تلاش تھی وہ ہی نہ مل سکا

لوگوں کی ورنہ نظر کرم خاص تو رہی

مانو کے دل کسی پہ بھی آیا نہیں کبھی

حالانکہ وصل رت بھی میرے پاس تو رہی

خو شبو تیری بچھڑ کے بھی تجھ سے میرے حبیب

........بن کر تیرے وجود کا احساس تو رہی

کھلے ہیں میری زندگی کے سارے ورق

نا جانے کب کوئی آندھی اڑا کے لے جائے

کسی کا درد کہاں تک میں اپنے پاس رکھوں

یہ جس کا ہو وہ نشانی بتا کے لے جائے

تو جاناں

اب جُدائی کی گھڑی نزدیک آتی ہے

چلو آنکھیں پہ بوسہ دو

کہ اب بچھڑے تو شاید پھر کبھی ملنے نہ پائیں ہم

زمانہ درمیاں یوں آ گیا ہے

کہ اب دُوری یقینی ہو گئی ہے

ہم اپنے آپ میں گُم بڑھتے جاتے تھے

بلا سوچے بلا سمجھے

مگر اب کے

زمانہ درمیاں یوں آ گیا ہے

کہ خوابوں کی کوئی تعبیر ممکن ہی نہیں ہے

اور کچھ اس میں ہماری اور تمھاری نیتّوں کا دوش بھی ہے

تو جاناں

اَب جُدائی کی گھڑی نزدیک آتی ہے

چلو آنکھوں پہ بوسہ دو

کہ اب بچھڑے تو شاید پھر کبھی ملنے نہ پائیں ہم

ہمیں کیا کیا ملا اس آستاں سے

دیارِ درد سے کُوئے فُغاں سے

مرا سایہ بھی مجھ سے ہے گریزاں

شکایت کیا غبارِ کارواں سے

تلاش و آرزو میں عمر گزری

”تجھے اے زندگی لاؤں کہاں سے“

محبت ہی تھی انعامِ محبت

میں جب نکلا غمِ سُود و زیاں سے

بہاروں نے فقط دیوانگی دی

کوئی امید ہے تو ہے خزاں سے

”تکلف برطرف میں صاف کہہ دوں“

تمہارا نام ہے اِس بے نشاں سے

حریمِ ناز میں ہے ذکر میرا

کہاں تک بات پہنچی ہے کہاں سے

مقدر ہی ترا ایسا ہے سرور

گلہ کیسا زمین و آسماں سے

خود فریبی کو، ستم ہے، آرزو کہتے ہیں لوگ

شوقِ گمراہی کو ذوقِ جستجو کہتے ہیں لوگ

دیدہ و دانستہ دیتے ہیں نگاہوں کو فریب

پھول کے چاکِ جگر کو رنگ و بُو کہتے ہیں لوگ

ایک ہم کیا، آپ کی چشمِ کرم کی داستاں

در بہ در، قریہ بہ قریہ، کو بکو کہتے ہیں لوگ

زخمِ دل پر ڈال دیتے ہیں مقدر کی نقاب

چاک پیراہن کو اعجازِ رفو کہتے ہیں لوگ

کوئی چپ رہ کر بھی کب محفوظ ہے تنقید سے

میری خاموشی کو بھی اب گفتگو کہتے ہیں لوگ

اس دیارِ اجنبی میں لٹ چکی، مدّت ہوئی

جس کو خوش فہمی سے اب تک آبرو کہتے ہیں لوگ

اس بیانِ حال سے اقبال اب حاصل بھی کیا

چارہ سازی کے عوض لا تقنطو کہتے ہیں لوگ

بہت چپ ہو شکایت چھوڑ دی کیا؟

رہ و رسمِ محبت چھوڑ دی کیا؟

یہ کیا اندر ہی اندر بجھ رہے ہو

ہواؤں سے رقابت چھوڑ دی کیا؟

مناتے پھر رہے ہو ہر کسی کو

خفا رہنے کی عادت چھوڑ دی کیا؟

لئے بیٹھی ہیں آنکیھیں آنسوؤں کو

ستاروں کی سیاحت چھوڑ دی کیا؟

غبارِ شہر کیوں بیٹھا ہوا ہے؟

مرے آہو نے وحشت چھوڑ دی کیا؟

فقیروں کی طرف آنے لگے پھر

نمائش گاہِ شہرت چھوڑ دی کیا؟

میرے کمرے کو معبد کہنے والی

کہاں ہے تُو عبادت چھوڑ دی کیا؟

یہ دُنیا تو نہیں مانے گی عاصم

مگر تم نے بھی حجّت چھوڑ دی کیا؟

ہنسی معلوم ہوتی ہے فغاں معلوم ہوتی ہے

محبت زندگی کی داستاں معلوم ہوتی ہے

کِسی سے منزلِ مقصود پہچانی نہیں جاتی

مری حیرت شریکِ کارواں معلوم ہوتی ہے

نگاہِ دوست نے بخشی ہے سرافرازیاں کیا کیا

مگر جب دیکھئے نا مہرباں معلوم ہوتی ہے

نظر آنے لگے آثار تکمیلِ تمنا کے

محبت آج سعیِ رائگاں معلوم ہوتی ہے

بہت دھیمی ہے اے اہلِ چمن آنچ آتشِ گل کی

ابھی صجح بہاراں بھی دھواں معلوم ہوتی ہے

شکستِ آرزو کو مدتیں گذریں مگر قابل

نگاہِ دوست اب بھی بد گماں معلوم ہوتی ہے

ہم نے ہی لوٹنے کا ارادہ نہیں کیا

اسنے بھی بھول جانے کا وعدہ نہیں کیا

دکھ اوڑھتے نہیں کبھی جشنِ طرب میں ہم

ملبوس دل کو تن کا لبادہ نہیں کیا

جو غم ملا ہے بوجھ اٹھایا ہے اس کا خود

سرزیرِبارِ ساغر و بادہ نہیں کیا

کارِ جہاں ہمیں بھی بہت تھے سفر کی شام

اس نے بھی التفات زیادہ نہیں کیا

آمد پہ تیری عطر و چراغوسبو نہ ہوں

اتنا بھی بود و باش کو سادہ نہیں کیا

وقتِ سفر قریب ہے بِستر سمیٹ لُوں

بِکھرا ہُوا حیات کا دفتر سمیٹ لُوں

پھر جانے ہم ملیں نہ ملیں اک زرا رُکو

میں دل کے آئینے میں یہ منظر سمیٹ لُوں

غیروں نے جو سُلوک کئے اُن کا کیا گِلہ

پھینکے ہیں دوستوں نے جو پتھر سمیٹ لُوں

کل جانے کیسے ہونگے کہاں ہونگے گھر کے لوگ

آنکھوں میں ایک بار بھرا گھر سمیٹ لُوں

سیلِ نظر بھی غم کی تمازت سے خُشک ہو

وہ پیاس ہے ملے جو سمندر سمیٹ لُوں

اجمل بھڑک رہی ہے زمانے میں جتنی آگ

جی چاہتا ہے سینے کے اندر سمیٹ لُوں

وہ تو بس وعدہء دیدار سے بہلانا تھا

ہم کوآنا تھا یقیں اُن کو مُکر جانا تھا

لاکھ ٹُھکرایا ہمیں تو نےمگر ہم نہ ٹلے

تیرے قدموں سےالگ ہو کےکہاں جانا تھا

جن سے نیکی کی توقع ہو وُہی نام دھریں

ایک یہ وقت بھی قسمت میں مری آنا تھا

بے سبب ترکِ تعلق کا بڑا رنج ہوا

لاکھ رنجش سہی اِک عمر کا یارانہ تھا

نزع کےوقت تو دُشمن بھی چلے آتے ہیں

ایسےعالم میں تو ظالم تجھے آ جانا تھا

عمر جب بیت چلی تو یہ کھلا راز نصیر

حسن ناراض نہ تھا عشق کو تڑپانا تھا