کچھ وصال آخر تک متعبر نہیں ہوتے

ساتھ چلنے والے بھی ہمسفرنہیں ہوتے

تو ہماری قربت سے کتنا ہی گریزاں ہو

ہم تیرے ٹھکانے سے بےخبر نہیں ہوتے

کچھ کہے بنا اکثر بولتی ہیں آنکھیں بھی

گفتگو کے سب لمحہ حرف گر نہیں ہوتے

کتنا خوف ہوتا ہے شام کے اندھیرے میں

پوچھوں ان پرندوں سے جن کے گھر نہیں ہوتے

عمر بھر نہیں ملتا واپسی کا دروازہ

آگہی کے زندان میں بام و در نہیں ہوتے

سمندر کا تماشا کر رہا ہوں

میں ساحل ہو کے پیاسا مر رہا ہوں

اگرچہ دل میں صحرا کی تپش ہے

مگر میں ڈُوبنے سے ڈر رہا ہوں

میں اپنے گھر کی ہر شے کو جلا کر

شبستانوں کو روشن کر رہا ہوں

قفس میں مجھ پہ جو بیتی سو بیتی

چمن میں بھی شکستہ پر رہا ہوں

اُٹھے گا حشر کیا محشر میں مجھ پر

میں خود ہنگامہِ محشر رہا ہوں

کسا ہے جھوٹ کا پھندا گلے میں

میں سچائی کی خاطر مر رہا ہوں

مری گردش میں ہر سازِ الم ہے

جہانِ درد کا محور رہا ہوں

بنائی جو مرے دستِ ہنر نے

اُسی تصویر سے اب ڈر رہا ہوں

تراشے شہر میں نے بخش کیا کیا

مگر میں خود سدا بے گھر رہا ہوں

بکھرے بکھرے رہتے ہو

کیا کیا سہتے رہتے ہو

تم کو جانے کیا غم ہے

ہر دم ہنستے رہتے ہو

رستہ ہے نہ منزل ہے

پھر بھی چلتے رہتے ہو

جی اُٹھنے کی کوشش میں

اکثر مرتے رہتے ہو

تانے بکھرے خوابوں کے

اب تک بنتے رہتے ہو

اپنی باتوں پر خود ہی

اُلجھے اُلجھے رہتے ہو

لمحہ جی اس دنیا سے

تم بھی ڈرتے رہتے ہو

اب کے ہم بچھڑے تو شايد کبھي خوابوں ميں مليں

جس طرح سوکھے ہوئے پھول کتابوں ميں مليں

ڈھونڈ اجڑے ہوئے لوگوں ميں وفا کے موتي

يہ خزانے تجھے ممکن ہے خرابوں ميں مليں

غم دنيا بھي غم يار ميں شامل کر لو

نشہ برپا ہے شرابيں جو شرابوں ميں مليں

تو خدا ہے نہ ميرا عشق فرشتوں جيسا

دونوں انساں ہيں تو کيوں اتنے حجابوں ميں مليں

آج ہم دار پہ کھينچے گئے جن باتوں پر

کيا عجب کل وہ زمانے کو نصابوں ميں مليں

اب نہ وہ ميں ہوں نہ تو ہے نہ وہ ماضي ہے فراز

جيسے دو سائے تمنا کے سرابوں ميں مليں

دوستوں کا پیار مہنگا ہو گیا

عشق کا بازار مہنگا ہو گیا

پرسشِ احوالِ جاناں سے کُھلا

پیار کا اظہار مہنگا ہو گیا

درمیاں اک ہجر کی دیوار ہے

جلوۂ دلدار مہنگا ہو گیا

وصل کی خواہش بھلا کیسے کروں

آج کل دیدار مہنگا ہو گیا

کہہ رہے ہیں میری حالت دیکھ کر

شیوۂ گفتار مہنگا ہو گیا

زلفِ خوباں تک رسائی کیا ہوئی

سایۂ دیوار مہنگا ہو گیا

پھول چہرے پر تبسم کیا کھلا

آتشیں رخسار مہنگا ہو گیا

مست آنکھوں کے حراست میں چلے آئے ہیں

بے اماں لوگ حفاظت میں چلے آئے ہیں

یوں لگا ہم کو تیرے دل میں اتر کر جیسے

بادشاہ اپنی ریاست میں چلے آئے ہیں

تختہءدار پہ پہنچے ہیں تو اب سوچتے ہیں

ہم کہاں آپ کی چاہت میں چلے آئے ہیں

ہم کو اس جنگ کے اسباب نہیں ہیں معلوم

ہم تو بس شوقءشہادت میں چلے آئے ہیں

اہلءاطہار سے لو جس نے لگا لی سمجھو

لوگ وہ سایہءرحمت میں چلے آئے ہیں

میں اسد کوئی طلبگار نہ تھا فاقوں کا

یہ تو بس میری وراثت میں چلے آئے ہیں

اپنی آگ کو زندہ رکھنا کتنا مُشکل ہے

پتھر بیچ آئینہ رکھنا کتنا مُشکل ہے !

کتنا آسان ہے تصویر بنانا اوروں کی

خود کو پسِ آئینہ رکھنا کتنا مُشکل ہے

تُم نے مندر دیکھے ہوں گے یہ میرا آنگن ہے

ایک دیا بھی جلتا رکھنا کتنا مُشکل ہے ! !

یہ راز کون جانے کس کا قصور تھا

ٹوٹا وہی سہارا جس پہ غرور تھا

اُسے ہے غرور کے وہ کسی اور کا ہے

ہمیں ہے ناز کے وہ کبھی ہمارا ضرور تھا

تنہا تنہا مت سوچا کر

مر جائے گا مت سوچا کر

اپنا آپ گنوا کر تو نے

پایا ہے کیا مت سوچا کر

دھوپ میں تنہا کر جاتا ہے

کیوں یہ سایہ مت سوچا کر

پیار گھڑی بھر کا بھی بہت ہے

جھوٹا، سچا مت سوچا کر

ٕراہ کٹھن اور دھوپ کڑی ہے

کون آئے گا مت سوچا کر

وہ بھی تجھ سے پیار کرے ہے

پھر دکھ ہو گا مت سوچا کر

خواب، حقیقت یا افسانہ

کیا ہے دنیا مت سوچا کر

موندے آنکھیں اور چلا چل

منزل، رستہ مت سوچا کر

جس کی فطرت ہی ڈسنا ہو

وہ تو ڈسےگا مت سوچا کر

دنیا کے غم ساتھ ہیں تیرے

خود کو تنہا مت سوچا کر

جینا دو بھر ہو جائے گا

جاناں ۔ اتنا مت سوچا کر

انگڑائی پر انگڑائی لیتی ہے رات جدائی کی

تم کیا سمجھو، تم کیا جانو، بات میری تنہائی کی

کون سیاہی گھول رہا ہے وقت کے بہتے دریا میں

میں نے آنکھ جھکی دیکھی ہے آج کسی ہرجائی کی

ٹوٹ گئے سیال نگینے، پھوٹ بہے رخساروں پر

دیکھو میرا ساتھ نہ دینا، بات ہے رسوائی کی

اُڑتے اُڑتے آس کا پنچھی دُور اُفق میں ڈوب گیا

روتے روتے بیٹھ گئی آواز کسی سودائی کی